المجلس العسكرى هو عدو الثوره الاول
فمنذ دخوله الى البلاد بقوات جيشنا الحر وهو التزم الحياد وتركنا نقتل.ماحدث عند دخول الجيش عندنا فى السويس مثلا انهم لم يتحركوا لوقف المجزره اللى كانت عند قسم السويس الا بإذن من القياده وحتى بعد الاذن لم يستطيعوا احتواء الموقف او لم يريدوا احتواء الموقف.
وايضا ماحدث فى موقعه الجمل كان قدام عينه وكانوا قاعدين يتفرجوا الا الضابط ماجد بولس الذى خالف اومر المجلس وتدخل لتأمين احد مداخل الميدان وقمع البلطجيه.
ده غير المحاولات اللى كانوا بيعملوها لاخلاء الميدان من ضرب الرصاص فى الهواء وتحريك الدببات والمدرعات فى محاوله ادخالها للميدان للسيطره عليه ولكنهم فشلوا فى ذلك.
لذلك وبعد مرور 14 يوم على دخولهم البلاد وبعد ماعرفوا ان الشعب هو اللى هينتصر قالوا يلا نركب الموجه وقالوا ان هما السبب فى تنحى مبارك ههههههه
امال اللى احنا عاملناه ده ايه :
مين اللى وقف قدام الشرطه والقوه المفرطه اللى استخدمتها معانا
مين اللى استشهد منه المئات واصيب الالاف
مين اللى كان موجود فى التحرير واستحمل البرد القارص
مين اللى كان بيواجه البلطجيه اللى موتوا مننا ناس
مين ... مين ... مين
وبعد التنحى
شوف المجلس العسكرى عمل ايه
عمل ايه..... عمل ايه .....عمل ايه ....
انا اقولك عمل ايه :
عمل استفتاء ولم يطبق نتيجه الاستفتاء وخلى الشعب يضرب فى بعده بسبب الاستفتاء.
لم يحافظ على الامن والاستقرار للبلاد فالجيش مش موجود فى الشوارع بكثافه ولا الشرطه عايزه تنزل ومش عايز يحل مشكله الانفلات الامنى.
لم يستطع منع الفتنه بين المسلمين والمسيحيين فى امبابه ولم يتدخل فى الامر الابعد خراب مالطا (امبابه).
عمل قانون لتشكيل الاحزاب على هواه وبدون مشاركه احد كذلك الامر فى قانون مباشره الحقوق السياسه.
وعمل قانون لتجريم الاعتصام !!!! ازاى واحنا فى ثوره.
فض الاعتصامات بالقوه المفرطه والتى ادت الى مقتل عدد من الثوار فى اعتصام 9 ابريل .
واعتقال شباب الثوره وتحويلهم الى المعتقلات والمحاكم العسكريه بتهمه التحريض على التظاهره !!!! برده ازاى واحنا فى ثوره.
ده غير جريمه كشف العذريه للمحتجات المعتقلين من ميدان التحرير فى فض اعتصام 9 مارس.
ده غير الهبل اللى بيحصل فى محاكمات رموز النظام السابق.
والتأخير فى محاكمه المخلوع من قبل الشعب فقط والتى لم تأتى الا بعد ما دفعنا التمن من دمنا فى اعتصام 9 ابريل وفى الاخر برده متحاكمش وقاعد فى مستشفى شرم الشيخ الدولى وبيتعالج على نفقه الدوله.
ده غير اعتقاله لاى شخص ينتقده وتحويله للنيابه العسكريه.
غير اسلوب الترهيب للاعلام وجعله ينصاع لاوامره كايام مبارك واسواء كمان.
ده غير ... ده غير ...ده غير
وفى الاخر يقولنا انه شريك فى الثوره .... حمرا
وفى الاخر بوجه رساله للمجلس العسكرى :
لازم تعرف اننا الثوار اللى لينا الشريعه وانتوا مجرد موظفين بتديروا شئون البلاد وتنفيذ مطالبنا خصوصا ان ما نطلبه ليس من المستحيلات وف حدود المعقول ,مش انتوا تعملوا اللى فى دماغكم وكمان عايزين تقولولنا نعمل ايه
وكمان لازم تتقبلوا النقد والاختلاف فى الرأى ومتحطوش راسكم براسنا لانكم مش شركاء فى الثوره.
وشكرا
ليست هناك تعليقات:
إرسال تعليق